App za jejkawóskowanje

(Rozblad)

Štó by sej myslił, zo móžu sej raz ze serbskim jutrownym jejkom swój wšědny chlěb zasłužić! Haj a nic jeno to, samo hišće dowol a wutwar domskeho. Njemysliće nětko božedla na tradicionelne wóskowanje, te časy su nimo. Hdyž na to myslu, kak sym hodźiny dołho z křiwym chribjetom a małej swěcu na jutrownych wikach w Serbskim domje sedźo a kur zadychajo swoje třiróžki z pjerom na jejko sadźała, to jenož hišće z hłowu wiju. Kupił tla nichtó ničo njeje, jenož hladali su, wosebje na płaćizny abo mytowanske wopisma. Nó haj, to je jich prawo było. Ale časy so měnjeja a parowali su tam stajnje dorost.
Potom pak bě tajka faza, hdyž bě ručne dźěło naraz zaso »in«. Młode žony su započeli dźěćom drasty šić, nic z nuzy, božedla, mějachmy drastow dosć a nadosć, ně, skerje z wostudy abo tak. Haj, a tež jejkawóskowanje bě nadobo zaso chětro »in«, wosebje z bio-jejemi. To bě takrjec cyle politically correct. A potom hišće ta wěc z tym wóskom. Wot pčołkow! Žane druhe zwěrjatko drje njeje sej w tutym času wjac škita a sympatije zdobyło. Tohodla je škit insektow wězo tež wabjaca wěc za młody Volk był. Ja sym jim rjane wideja na YouTube stajiła a wšitke techniki a mustry jejkadebjenja rozkładła. Dźensa so přez to trochu mjerzam, dokelž, štož je jónu w syći, je preč, a njewěš, što so wšo z tym čini. Wšojedne, tuta faza je tež zaso nimo a zbohatnyła z tymi YouTube-widejemi tež njejsym. Něšto nowačkow wjac je so na wubědźowanju wo najrjeńše jutrowne jejko wobdźěliło, a to z cyłeho swěta. Dźakowano mojim widejam!
Paralelnje k modźe ručneho dźěła su naraz tež mandala-wobrazki zaso wulka moda byli. Dorosćeni ludźo sedźachu kaž dźěći z wumolowanskimi zešiwkami doma. To bě tajki wulki boom, zo měješe firma Edding w Budyšinje woprawdźity problem dosć pisakow dodawać. W nakładnistwje a załožbje sym prědowała kaž błudna, zo njech skónčnje na tutón trend reaguja a tajki wumolowanski zešiwk z jutrownymi jejkami w ćežkich mustrach za dorosćenych produkuja. To by był tón hit na jutrownych wikach! Ale nó haj, nětko je přepozdźe, tež tutón čas je nimo.
Ale chcych wšak powědać, kak sym woprawdźe k pjenjezam přišła. Mjeztym smy tak na naše nowe medije wjazani, zo je ručne dźěło něšto za muzej a domiznowědu. Tak sym sej tutón raz kruće předewzała, nic zaspać a hižo krok dale być. Sym hromadźe z přećelom programěrowała »app za jejkawóskowanje«. Funguje cyle jednorje. So po wobrazowce swojeho smartphona z porstom hibajo móžeš běłe jejko pomolować. Wězo móžeš jejko tež we wšěch barbach, kiž digitalna paleta poskića, wobarbić. To najrjeńše na tym je, zo jejko barbu stajnje přiwozmje, a to prawidłownje! Mam to za woprawdźity předskok porno tradicionelnemu jejkawóskowanju.
App sym profesionelnje zwičniła a mam wšědnje na sto downloadow. Trend je wěsty a wostanje stabilny, dokelž zwjazuje jejkawóskowanje na handyju modernu z folkloru. To sym sej z wabjenskich tekstow Serbskeho ludoweho ansambla wothladała. Njesmějće so, to je přichod, pčołki su preč, wósk tež, kokoše wjac jeja njenjesu a husy su wotlećeli. Njeskomdźće tež wy moderny čas! Ale kedźbu, na app mam ja wšě prawa.

JUTROWNEJEJKO.COM