Zezjawnostnjenje projekta »musica nova sorabica«

CHRYSTA MEŠKANKOWA

Dožiwiwši loni w oktobrje projekt »musica nova sorabica«, zarjadowany třeći raz wot Załožby za serbski lud a spěchowany tohorunja přez Serbski ludowy ansambl a Kulturny rum Hornja Łužica-Delnja Šleska, smě so reziměrować:
Porno předchadźacymaj zarjadowanjomaj tutoho razu njebě to stagnacija, ale dalši rozmach. Zwoprawdźi so zaměrnje hesło »tradicija + eksperiment«. Nawjazujo na něštožkuli směr postajowace zašłych lětdźesatkow přez Jura Mětška, Jana Rawpa, Jana Pawoła Nagela, Detlefa Kobjelu, Jana Cyža, Ulricha Pogodu kaž tež Lianu Bertókowu a Dietera Kempu a dalšich našočasnych komponistow, předstaji so pod sylnym aplawsom nětko tež nowa generacija, kotraž z wjele energiju wuspěšnje komponowanje w stilu klasiskeje moderny a zdźěla tež jara wuraznje postmoderny dale wjedźe. Tak wujewichu so twórby Sebastiana Elikowskeho-Winklera, Feliksa Brojera, Clemensa Christiana Pötzscha w zhromadnym dźěle z Walburgu Wałdźic a dalšich jako pokročowanje a zdobom wudospołnjenje pod jasnymi znamjenjemi postupa. Nowa generacija wuměłcow a wuměłčow nima dźě jenož prawo, ale samo tež wěstu winowatosć, swoju dobu a swoje dopóznaća adekwatnje interpretować, a to w hudźbje runje tak kaž w literaturje a tworjacym wuměłstwje.
Je wozbožliwe, zo móžeše hudźbnik Gerold Gnausch, kiž je nastupajo swětowe trendy derje wobhonjeny a dźěło serbskich kolegow derje znaje, wotewrjenje prajić: »Serbja njejsu stejo wostali a su swój puć do Europy namakali.«
Programy njeběchu jenož dobre, ale tež jara profesionelnje zestajene. Koncept třoch koncertow na třoch rozdźělnych městnach w Budyšinje wopokaza so jako derje wutrjecheny. Naroki na interpretow běchu wotpowědnje wysoke. Jara derje tak! Tu wopokaza tež Anka Němcec ze Załožby za serbski lud sobu dobru ruku. Hladajo na wulke mnóstwo paralelnych poskitkow pak běše ličba recipientow (bohužel zaso jónu) njespokojaca. Ale móhło drje to hišće hórje być.
By snadź přeorientowanje projekta na mały serbski festiwal noweje artificielneje hudźby wupuć był? Předstajomne je tajke swjedźenjowanje we wotměnje z dwulětnje so wotměwacym Budyskim hudźbnym nalěćom. Spomóžne by při tym intensiwne zhromadne dźěło a wothłosowanje mjez Załožbu za serbski lud, Serbskim ludowym ansamblom a Kulturnym hamtom Budyšina było. Hač pak móža sej zamołwići dalewuwiće po kwaliće wysoko zapołoženeho kulturneho projekta pod hižo dosć wuspěšnej marku »musica nova sorabica« předstajić?