Na djasowych puśach

Jill-Francis Ketlicojc (Źilka)

co se mysliš wó sławje a pśisuźe?
co se mysliš wó cwiblowarskem swěśe?
tšugaju wše twóje cowanja
do rozymoju napśeśiwneg směra?
Carne wóźisko bźez brjoga
Twója duša wuboga

chto jo śi rozjasnił pśicynu a zmysł?
chto jo śi gronił, kužda wutšoba móžo zabyś?
pó jěrych bólosnych pórazkach
pytaš pózdatnu gluku na djasowych puśach?
Wutšoba za śerninu
Połni se ze jśmu

źo sy ty wótzamknuł wěrnosć a winu?
źo sy ty zakopał twóju nejspócetnjejšu naźeju?
rejujucy posporomje pśepajźi
cujoš pśižyconu górcotu w twójej kšwi?
Slěpje wubrany schow
W pazorach djasow

Baseń „Na djasowych puśach“ jo inspirěrowana wót spiwa „Devils“ finskeje kupki The 69 Eyes.