Schadźowanka – radowanka

Christina Brězanec-Žurowa, Diana Šołćina

Přičiny, čehodla na schadźowanku dźeš, su tak wšelakore kaž ludźo, kotrychž tam zetkawaš. Outfit sedźi, frizura tež, a dale?
Wo dobru naladu a wjesołu mysličku postara so 24. nowembra wulkotna skupina Jankahanka, kotraž zawěsće te abo tamne naprašowanje dla dalšich wustupow přijimać smědźeše. Z wuběrnym wustupom hižo do oficialneho započatka programa połoži so łata chětro wysoko. Čerstwe a ze zahoritosću přednjesene wariacije serbskich ludowych spěwow w jazzowym a swingowym stilu zahorichu cyły publikum. Młodźi hudźbnicy wustupichu ze sylnym sebjewědomjom a wuprudźachu wjeselo. Zboka jewišća nastajena band postara so we wšelakich wokomikach wo wurunanje słabych wokomikow programa.
Tajki słaby, dokelž njezrozumliwy wokomik pokaza so hnydom po witanju Diany Naglec a Heleny Bětnarjec – moderatorkow wječora. Předstajenje póštoweje karty z bajkacym motiwom serbskeje čerwjenawki a wjelka wuwabi posměwk a posylni wočakowanje na pointu. Tute wočakowanje so z přednošowanym tekstom spěšnje wochłódni. Rezultat běchu bjezradne a zamylene mjezwoča. Po tutym přinošku so moderaciski por hižo zwoprědka zamołwi, zo narokam moderacije poslednjeho lěta wotpowědować móžno njebudźe. Čehodla tajki statement? Sebjewědoma a wěsta moderacija nima přirunanje trjeba.
Sćěhowaše hižo něšto lět wuspěšny studentski spěwny kabaret – tak mjenowane wabjenja. Tuta skupina so po spočatnych njewěstosćach wot wustupa k wustupej stopnjowaše. Ze šćipatymi słowami storčichu na njedostatki serbskeje politiki zašłeho lěta. Hač bě to nalěpkowa akcija «a serbsce?» abo smjerć serbskeho sejmika, hdźež so samo tradicije pohrjeba předstajichu abo tež starosće Drježdźanskich studentow internatneje etaže dla. Šwikachu zamołwitych ze šibałymi, druhdy samo chětro direktnymi słowami.
Prěni raz měješe Drježdźanska staršiska iniciatiwa přinošk přihotowany. Dźiwadłowy repertoire wosebje Budyskeje kokoše bě wusahowacy, bohužel so zmysł a wobsah kóždemu njewotewri. Štóž wo problematice Drježdźanskich prócowanjow ničo njewědźeše, tež po tutym přinošku mudriši njebě. A tuž žněješe tež w tutym wotrězku Jankahanka najsylniši aplaws.
Po tróšku kopolacej so moderaciji z přehladku a wróćozhladowanjom na lěto 2012 sćěhowaše bohužel skomoleny programowy dypk. Zmylk běše nětko techniskeho razu časoweho managementa akterow dla. Na žortny wobsah móžachmy dla špatneje wobrazoweje kwality jenož tukać. Škoda! Hudźba, kotraž film wobrubi bě jara hnujaca a dramatiska, tak zo da nastork, sej přinošk w syći hišće raz dokładnišo wobhladać.
Wulki kompliment a chwalbu zasłuža sej 12-tki Serbskeho gymnazija. Z předstajenjom situacije Serbskeho ludoweho ansambla wusahowachu młodźi hrajerjo z dotalneho programa. Na jara lóštne a žortne wašnje prezentowachu charaktery w zwisku z personalnej politiku SLA. Škrička zahoritosće hnydom na publikum přeskoči. Młoda skupina dawa nadźiju na dalše naročne kabaretne hry přichodnych schadźowankow.
Připowědźena přestawka so na trochu skepsane wašnje započa. Hdyž moderatorce ze ćmy na hosći rěčitej, da njezadźiwa, zo so tući přezahe z městnow pozběhnu.
Na druhi dźěl programa wabjachu zaso Jankahanka přihladowarjow na swoje městna. Sćěhowaše program 1. serbskeje kulturneje brigady. Po dołholětnych diskusijach wo prezency a dołhosći jeje přinoškow wobmjezowachu so spěwarjo a hudźbnicy na jadriwe předstajenje zamóžnosćow młodych interpretow. Po wuběrnym wobrubjenju hercow sćěhowaše hudźbnohłósny kruch chóra. Pod dirigatom Friedemana Böhmy přeńdźeštej šibałosć a lóšt krucha na publikum, kotryž pak wot wulkotneho programoweho dypka wočakaše wjetši rozsah.
Namołwa moderacije na studentow z Halle, Jeny abo Zhorjelca njech je pohon k wobohaćenju přichodneje schadźowanki. Zo by so program tola wotměnjawy prezentował, pospytaštej so tež moderatorce na małej žortnej scenje. Wšako so lětsa jenož studenća z Drježdźan a Lipska na jewišćo zwažichu. Wobě skupinje wěnowaštej so demografiskej změnje a što z tuteje sćěhuje. Drježdźanscy předstajichu to z pomocu wadźenja mjez jandźelkom a čertom, kotrajž přirěčowaštaj čłowjekej-Serbej, kak měł změnje napřećo stupić. Někotražkuli žortna mysl pohonjowaše publikum k scenowemu přikleskej.
Jara derje a na kreatiwne wašnje předstajichu Lipšćenjo woteměranje serbskeje rěče. W sceneriji filma Jurassic Park, tu «Dźurasik Park» we Łužiskej holi, hdźež nadźijachu so wopytowarjo samo na maćernorěčny eksemplar. Tu naspomni so samo załoženje Domowiny. Wosebje zapřijeće publikuma wuwabi stajnje zaso aplaws a wutrobne smjeće přihladowarjow. Pointy sedźachu a wupytani Serbja zjawneho žiwjenja dachu so rady w předstajenym parku wobhladować.
Nadźijomnje bě wustup studentskeje šole nastork dalšim studentam, zaso wjetše a sylniše ćěleso wutworić. Ideja, zo publikum sobu spěwa, bě zawěsće derje měnjena, ale tu wotkryje so prašenje, za koho so spěwa? Wšako koncentrowaše so kóždy na swoje spěwanje.
Program zakónči so ze znatym předstajenjom a naličenjom wšěch zamołwitych a akterow. Dobry kónc wuchwaluje prócu, tak zakónči D. Naglec program 139. schadźowanki. Po tym přizamknychu so po zwučenym wašnju reje a zabawa w hornjej barje.