ŁUŽYSKE TURISTY A SERBSKA RĚC

HORST ADAM

Domowina jo se do swójogo programa teke zapisała, až co pódpěrowaś a spěchowaś serbski kulturny turizm. To groni, až mógu gósći a turisty z cełego swěta we dwójorěcnych stronach Dolneje a Górneje Łužyce na wšaki part se wopóznawaś z kulturnym bogatstwom Serbow w něgajšnem a něntejšnem casu. Wšake se južo za to cyni. Jaden z Domowinskich referentow jo sobu za to pólo zagronity, a załožyło jo se wósebne nadregionalne towaristwo «Serbski kulturny turizm», kótarež se bejnje procujo, aby swóje nadawki pśecej lěpjej społniło. Gromaźe z drugimi su se zestajili a wudali brošurki a prospekty, kótarež móžnosći za turizm «na serbskich slědach» pśedstajiju a za to wabje. A pó Łužycy wjedu wšake drogi a sćažki za drogowanje a kólasowanje, kótarež wjedu k serbskim pomnikam a městnam. W Dolnej Łužycy jo to na pśikład kólasowarska sćažka, ako ma našo lipowe łopjenko w serbskich barwach ako swójo znamje.
Mimo serbskich kulturnych a drugich pomnikow, nałogow, tradicijow a ludowych drastwow, kótarež móžomy gósćam a turistam w radnej licbje póstajiś, by pak dejali serbsku rěc wó wjele wěcej pokazaś a wužywaś w turistiskem źěle a žywjenju. Cesto ga pšašaju woglě­darje rowno za tym, źo mógu se zmakaś z našeju žyweju rěcu. Wšake za to južo mamy – na pśikład na toflach pśi drogach a pśi twarjenjach. Wjele wěcej pak jo móžno – mjazy drugim na jěźnych kórtach w gósćeńcach a hotelach.
Za tym pytamy w Błotach a drugich stronach bóžko pódermo.
Dobry pśikład za zjawnu prezentaciju serbskeje rěcy w turizmje jo nowy park za rozwjaselenje, kótaryž su załožyli blisko Noweje Jsy w dolnołužyskem Picańskem amśe. Tam su nejwažnjejše informacije pódane teke w dolnoserbskej rěcy, a w małem parku z póstawami słowjańskich bogow su jadnotliwe figury tejerownosći w serbskej rěcy wopisane. Teke tamne nowe plastiki ze serbskimi powěsćowymi figurami se z pomocu moderneje techniki rozjasniju mimo nimskeje, engelskeje a pólskeje rěcy w dolnoserbšćinje.
W juniju jo se zachopiło wuběźowanje «Serbka rěc jo žywa», źož kśě w Dolnej a Górnej Łužycy wunamakaś te komuny, ako su serbskej rěcy wósebnje mócnje pśichylone. To jo dobra góźba, aby se zroźili nowe ideje, aktiwity a projekty, kótarež na turistiskem pólu serbsku rěc lěpjej w zjawnosći pśedstajiś mógu.